தொலைக்காட்சித் தொடர்களில் நடிக்கும் அப்பா நடிகர்கள் அதிக அளவில் சம்பாதிப்பதாக சேலரி டாட் காம் என்ற இணைய தளம் தகவல் வெளியிட்டுள்ளது. தொலைக்காட்சிகளில் நடித்து அவர்கள் பிரபலமடைந்துள்ளதால் ரியல் எஸ்டேட் அதிபராகவும், மருத்துவராகவும், வக்கீலாகவும் தங்களில் சொந்த தொழில்களில் அதிக அளவில் பணம் சம்பாதிக்க முடிவதாகவும் அந்த இணையதளம் தெரிவித்துள்ளது.
அப்பா கதாபாத்திரம் என்றாலே சினிமாக்களில் சாதாரணமாக ஒரு சீனுக்கு வந்து போவார்கள். ஆனால் நெடுந்தொடர்களில் வரும் அப்பாக்கள் அப்படி இல்லை. இரண்டு திருமணம் செய்திருப்பார்கள். ஊருக்கு நாட்டாமையாக இருப்பார்கள். இல்லை என்றால் நடுத்தர குடும்பத்தில் மகளை படிக்க வைக்க கஷ்டப்படும் அப்பாவியாக இருப்பார்கள். இதுதான் சீரியல் அப்பாக்களின் நிலை.
அப்பா என்றால் எப்படி இருக்க வேண்டும் என்று கூறாமல் எப்படி இருக்கக் கூடாது என்பதற்காக இதுபோன்ற கதாபாத்திரங்களை நெடுந்தொடர்களில் உருவாக்கின்றனவோ என்னவே?
அதுவும் இரண்டு மனைவிகளை திருமணம் செய்து கொண்டுள்ள அப்பாக்கள் படும் பாடு இருக்க்கிறதே அப்பப்பா ! அதுவும் முதல் மனைவிக்கு பிறந்த பிள்ளைகளிடமும், இரண்டாம் மனைவிக்குப் பிறந்த பிள்ளைகளிடமும் சிக்கிக்கொண்டு அவர்கள் படும் அவஸ்தை சொல்லி மாளாது. தங்கம் தொடரில் விஜயகுமார் பரவாயில்லை அந்த கதாபாத்திரம் அப்படியே அவரின் நிஜ கதையை பிரதிபலிப்பது போல இருப்பதால் எப்படியோ சமாளித்து வருகிறார்.
ஆனால் முந்தானை முடிச்சு, தென்றல் தொடர்களில் வரும் அப்பாக்கள்தான் பாவம். அவர்களின் அந்தோ பரிதாப நிலை அப்படியே அவர்களின் முகத்தில் எதிரொலிக்கிறது. இதை எல்லாம் விட இரண்டு மனைவிகளிடமும் சிக்கிக்கொண்டு தவிக்கும் அப்பாக்கள்தான் அந்தோ பரிதாபம். வளர்ந்த குழந்தைகளை வீட்டிற்குள் வைத்துக்கொண்டு இரண்டு மனைவிகளையும் ஒரே வீட்டிற்குள் வைத்துக்கொண்டு குடும்பம் நடத்துகிறாராம் ஒருவர். அதை நாமும் வேலை மெனக்கெட்டு உட்கார்ந்து பார்க்க வேண்டுமாம்.
அப்பா என்றாலே அம்மாவின் அடிமை என்று சினிமாக்களின் சித்தரித்தனர். கடைசி ஒரு சீனில் அப்பாவிற்கு வீரம் வந்து அம்மாவை ஓங்கி அறைவார். அதற்கு ரசிகர்கள் கை தட்டுவார்கள். ஆனால் சீரியலில் அப்படி எல்லாம் எதிர்பார்க்க முடியாது இரண்டு மனைவிகளிடம் மாட்டிக்கொண்டு முழிக்கும் அப்பாக்கள்தான் அதிகம் உள்ளனர்.
ஒரு சில அப்பாக்கள்தான் பரம்பரை நடிகர்கள் பிற அப்பாக்கள் நடிகர்களாக மட்டுமல்லாது வக்கீலாகவோ, டாக்டராகவோ, ரியல் எஸ்டேட் அதிபராகவோ இருப்பார்கள். தொலைக்காட்சித் தொடர்களில் கிடைக்கும் புகழைவைத்து ரியல் எஸ்டேட் விளம்பரங்கள், மட்டுமல்லாது தங்களில் சொந்த துறையிலும் அதிகம் சம்பாதிக்கின்றனர் என்று சேலரி டாட் காம் இணையதளம் ஒன்று தகவல் வெளியிட்டுள்ளது.
தந்தையர்களை போற்றும் இந்த தந்தையர் தினத்திலாவது தந்தையரை மதிக்கும் வகையிலான தொடர்களை எடுக்கா விட்டாலும் தந்தையர்களை அவமானப்படுத்தும் விதமான தொடர்களை எடுக்க வேண்டாத் தந்தை நடிகர்கள் கதறுவது இயக்குநர்களின் காதில் கேட்குமா?
No comments:
Post a Comment